Mandrivak bere azken bertsioa atera berri du, Mandriva 2007.1 Spring. Urtebeteko zikloei jarraitzeko erabakian atzera egin, eta aurten zikloaren erdian azken berrikuntzak dakartzan distribuzioa kaleratzen hastea hobetsi dute. Erabaki ona, zalantza barik, bertsio berria egonkorrak diren azken elementuetan oinarritzen baita, haiei hobekuntzak eta elementu berriak gehituta.
Powerpack instalatu dut, betiko moduan, eta orain arte Mandrivak inoiz atera duen distribuziorik onena deritzo pinguino honek. Nik, behintzat, inoiz baino zainduago sumatu dut, Mandriva 2007k muntatze sisteman eman zituen arazotxoak atzean guztiz utzita.
Dakartzan aurrerapen praktikoen artean, rpm-ak instalatzeko sistema da, orain modu adimentsuagoan egiten dena, nire aburuz, betiko estiloari eutsirik. Kerry Beagle artxibo bilatzailea ere oso tresna indartsua eta azkarra da, ohiko bilatzailea baino askoz osoagoa, nik erretilutik kendu dudan arren (ez dut hain maiz behar…).
Itxurak itsutzen dituenentzat, Mandriva berriak 3Dko idazmahairako tresna txukunak dakartza: Beryl eta Metisse, orain Gillen Ateaken Vista delakoak izugarrizko berrikuntza moduan saldu nahi digun sistema baino lehenagoko asmakuntzak biak. Baina tira, nik 3Dko pitokeria gutxiago eta idazmahai praktikoagoa gurago.
Windows-menpekoentzat badakar bereziki interesgarria izan daitekeen beste aplikazio indartsua: VirtualBox. Tresnak honek gure ordenagailuan sistema birtualak instalatzen uzten digu. Zer den hori? VirtualBoxen bitartez beste sistema eragile bat instala dezakegu (Windows, esaterako, edo beste Linux bat -Ubuntu, Suse…- nahi bada) guk adierazitako partizioan, baina gure Mandrivaren barruan abiarazteko aukerarekin. Beraz, suizidaren batek Vista nahi balu ere, Linuxen barruan abiaraz lezake Linuxek ematen dion egonkortasun eta seguritatearekin, eta bertatik nahi dituen aplikazio guztiak erabili. Ez dut uste Gilleni holako tresnak lar gustatuko zaizkionik…
Horiez guztiez gain, Mandrivak ahalegin berezia egin du ikus-entzunekoetan, eta bideoa eta audioa kudeatzeko programak inoiz baino hobeto dabiltza bertsio honetan: Kino, Lmms, Mixxx… Gainera, menuan Google Earth eta Google Picassa instalatzaileak agertzen zaizkigu, nahi izan ezkero klik batekin eskuratzeko eta prest izateko.
Hau eta gehiago topatuko duzue; gero eta aitzaki gutxiago Microsoften atzaparretan jarraitzeko, oraindik sufrikario horretan bizitzen jarraitzeko tematuta bazabiltzate ere…
