Tag Archives: tokiko

Gertukoan murrizketak? gertukoan inbertsioak behar ditugu

by arantzabal

Onda Cero irratian kendu dute gertuko informazioari eskaintzen zioten arratsaldeko tartea. Berdina egin berri dute Ser kateak eta Copek. Murrizketak eta murrizketak besterik entzuten ez diren momentu hauetan kentzea erabaki dutena lokala izan da. Euskadi Irratian jarraitzen dute “Gertukoak” deitzen den tartearekin. Noski, gertukoak dira Gasteiz, Bilbo eta Donostiatik gerturatu gura dizkiguten notiziak, eta izan litezke gertuko, baina nago ez dela asmatzen sarritan. Telebistan ere gertukotzat saltzen dizkigute hiriburuetakoak eta gertukoak badira, baina askotan hiriburu horietarako bakarrik…

Gertukoaz baino lokalaz jardun zuen Tokikomeko jardunaldietan Bart Bijnens-ek. Goienan izan genuen bisitan aurreko egunean eta haren esanak oso kontuan hartzekoak izango dira eskualdeka funtzionatuko dugun hedabideetarako. “Are lokalago, are gertukoago, are hobea” zioen berak eta esango nuke datuek laguntzen digutela horrela pentsatzen. Muzin eginda herrietatik eta eskualdeetatik kanpokoez? bai zera! Interesez jarraitzen dugubaita Euskal Herriaz kanpokoa ere eta badu interesik gure bezeroendako.

HetBelangVanLimburg.jpg

Bere eskualdean liderra den tokiko egunkariak 100.000 ale saltzen ditu
egunero, ia hiru laurden harpidetza bidez. Duela hilabete batzuk,
egitasmo hiperlokalari ekin diote, irakurleak ere egunkariaren parte
bihurtuz. Badugu zer ikasia, asko dugu ikasteko, baina erronka handiena ez da izango orokorra lantzea eta bai gertukoen den horretan sakontzea.

Jaitsi dut iPad-era http://www.hbvl.be
Lokalean ere gero eta gehiago dira smartphoneetan eta tablet-etan irakurtzen dutenak… Goienan ere baduzu aukera:

Gertukoa ez da beti tokiko eta bai tokikoa gertuko; gertukoa bai, beti da notizia gertukoa

by arantzabal

Aspalditxoan nabil bueltaka gertuko berbari. Eta horrenbeste kontu somatzen ditut gertuko… Niretzako oso gertukoa
da Unai Iturriagak asteazkenetan ateratzen duen Berriako artikulua, edo Anjel
Lertxundik egunero dioskuna; gertuko ditut Argiako hainbat blog eta gertuko
(oraindik gertuko 🙂 sumatu ditut Gaztezuloko hainbat atal. Gertukoak ere
Twitter bidez jarraitzen ditudan hainbat lagun. Denek dute lekua nik irakurri edo ikus-entzun gura nukeen hedabidean.

Tokikoari garrantzia ematen pasa dugu hainbat
urte. Horrela sortu genuen guk geuk “Tokiko telebisten elkartea”,
esaterako, edo “Tokiko hedabideak” kontzeptua erabiltzen dugu takian potian… eta sortzera
goaz orain Tokikom deitzen den enpresa, Topaguneak bultzatu eta tokiko
hedabideok jabe izango garen enpresa. Izena asmatua eta bide zati bat eginda
dago eta horrek ez du atzerabuelta errazik, baina orain espazio edo
esparruetarako baino gehiago gaude bihotzari begiratzeko.

Bihotza da gertukoa eta esparrua tokikoa

Horregatik, behar dugu inoiz baino gehiago gertuko informaziotik tokikotik
baino. Emozioak mugitzen gaituzte gaur lur zatiek baino. Guk, Debagoieneko
informazioa ematen dugu sarri, tokikoa, baina aterik itxi barik gertukoari.
Gertuko dugu Gipuzkoako Foru Aldundian gertatzen dena, edo gertuko dugu
kontra-azalean atera dugun Gorka Urbizuri egindako elkarrizketa. Gertuko ditugu
berez, eta gertukoago egiten saiatzen gara gure hedabideak erabiliz. Tokikoak
direlako? ez horrenbeste, baina bai gure bezero ikus-entzuleentzat erakargarri
direlako eta gustuko dituztelako. Gertuko direlako azken batean. Badago zerbait
tximeletak mugiarazten diguna, eta hori, gaur, inoiz baino gehiago, gertukoa
da.

Badatoz tokiko telebista gehiago, gertu-gertukoak

by arantzabal

Badatoz, badatoz! Hasi dira badatozela esaten ere. Debagoieneko enpresak hasi dira mezuak jasotzen, baina zure eskualdekoak ere izango dira jo-puntu. Bidali dituzte kartak hara eta hona eta zuk ere jasoko zenuen zerbait, seguruenik. Heldu zait eskuetara Debagoienera datorren telebista baten aurkezpena-edo. Tokiko telebistak direla ez dago dudarik bidalitako aurkezpen gutuna irakurrita ;-( Karta osoa kopiatu dut hitzez hitz:

Lagun agurgarria:

Gaur eguneko, gure herrialdeko informazioan, X-TV-ak (telebista hau zein den ez da inporta…) zeregin garrantzitsu eta positiboa eduki du. Jakitun, gaur egun eta etorkizuneko gure gizartean, X Telebistak bezalako telebista lokal baten garrantziari buruz, X telebistatik gure herrialdeko empresa (sic) eta instituzioekin konpromezu (sic) eta lankidetza iraunkor batean jokatzen jarraitu nahi eta behar dugu.

Gure esperientzia, orain arte, oso aberasgarria izan da. Horregatik nahi dugu, gipuzkoako (sic) mundu enpresarialarekin daukagun lotura, enpresa eta instituzioekin lankidetza esparru izan dadin. Era honetan,gure helburua, harreman iraunkor eta gertukoak bultzatzea da. Eta hortarako, zuen telebista eta euspen izan nahi dugu, zuen proiektuak burutzeko.

Denok dakigu Gipuzkoak eta hiritarrek telebista hurbila eta atsegingarria galdatzen dutela. Horregatik hemendik, konpromiso etikoa hartu nahi dugu zuekin eta gizartearekin, eta gure lankidetza osoa eskaini nahi dizuegu Gipuzkoa gure telebistaren protagonista nagusia egiteko.

Kalitatea, zorrostasuna (sic), orainaldia eta gertutasuna izango dira beti gure mugarriak datorren telebista digitala burutzeko. Gipuzkoako telebista. Gipuzkoarako telebista.

Lerro hauetatik zehar, X-ekin kolaborazio modu berriak bilatzen animatu nahi zaitut. Zuen telebista eta euspen izan nahi dugulako. Elkar gora egingo dugulako.

Adeitasunez,

X telebista