- Kantuez: Jendea, kantuez jarduten da, obra zatiez. Gero eta gehiago zatiak dira arrakasta izaten dutenak. iTunes-ek badu horren kulparik eta gure gailuetan zatiak ditugu, kanta solteak. Ezagutzen ditugu kantuak taldeak ezagutu gabe, esaterako.
- Albisteez: Kantuekin pasatzen den moduan pasatzen da albisteekin ere. Aldizkarietako azalak irakurtzeak baino garrantzia handiagoa hartu du albiste konkretua gure pantailetan irakurtzeak. Asko erraztu zuten RSS-ek hasieran, gerora Twitterrek eta orain aplikazio liluragarriek. Flipboard bidezko irakurle honek zatiak irakurtzen ditu nork argitaratuak diren jakin barik askotan.
- Obraz: Biak dira joerak, seguruen. Eta joerok geratzeko etorri direnik ezin uka. Hala ere, enpresa ikuspuntutik obrari eman behar diogu garrantzia.
Kantua aipatu dudanez, aipa dezadan adibide bat: Bide Ertzean taldearen obra. “77” deitzen den CDa. Gutixia bat. diseinu zaindua, testu onak eta sakonak, argazkiak, historia… eta kanta solteak ere bai. Batzuk beste batzuk baino hobeak, baina kantu solteen garrantziak (garrantzitsuak izanagatik) ez du horrenbeste inporta obrarekin konparatuz. Hau, erosteko CD bat da obra bat delako.
Berdin albisteekin-eta. Gurago nuke obra bat aipatu diskoa aipatu dudan moduko erraz irudikatzeko. Ez ditugu asko eta hain argiak. Gure komunikazio industriak ez ditu obra digitalak argitaratzen copypastetik harantzago. Ez ditugu argitaratzen. Zati onak han eta hemen, baina zatiak. Garrantzitsuak duda barik eta aberasgarriak zein erakargarriak irakurlearendako, baina industriarendako? Obrak dira interesgarriak industriarendako (gehiago tableten garaian) eta etorkizunean horixe izango da mimatu beharrekoa: obra. Orduan izango da erosteko hedabide bat, obra bat delako.
Atxagak hautsi zuen anphora eta gero Ordorikak obra bihurtu. Zatiak jaso eta obraren bila joatea dagokigulakoan nago ni ere.
