ASTEBURUARI BEGIRA; APIRILAK 21 ETA 22
Ez dugu denbora handirik behar izaten 100 kmautomobilez egiteko; aldiz, maratoiko 42 km pasatxo egiteko komeriak izaten dira maiz. Atzo, Eibarreko gizaseme batek 100 kmko bidaia egin zuen korrika; nahiz eta, lasterketak iraun zuen zatirik handienean bigarrena izan, amaieran laugarren postuarekin konformatu behar izan zuen. Munduko Txapelketa izan da eta meritu galanta du Asier Cuevas erraldoiak.
Korrika, oinez edota hegan ikusi ditugu Oñatin kirolariak. Aloñako igoera ospatu zen atzokoan eta eguraldiak irribarre bat eskaini zion lasterketari. Hala ere, bidean lokatza ugari izan zuten partehartzaileek eta horren adierazgarri, marroi koloreko zipristinak izan dira.. Irabazleak errekor berri bat ezarri du; hegan heldu ote den galdetzen duen gizaseme despistatu bat igarri nuen plazan, parapenteei begira, hegaldia edo korrikaldia ulertu guran. Aurreko egunetan izandako euriak eragindako lupetzak aise gainditu zituen Atzeko Kaleko Cuevas partikularrak; bere buruari ezarritako bi erronkak gaindituta, pozik eta asebeteta azaldu zitzaigun bazkari ordurako Larrañaga. Zorionak berari eta Jaxinto handiari. Koadrilako bazkariak apaindu du euritan antzua izan den igandea. Aitzitik, barrutik bustitzeko joera ere badugunez, euriari lekua hartu dioten beste edari afrodisiako batzuekin egin dugu topa. Tertulia interesgarria, mundua konpontze aldera, postrerako plana.
Melerik garrantzitsuena eskuratu zuen Ordiziako taldeak errugbian. Errege Kopako txapeldun berriak ditugu Goierritarrak. Zalegoak pozik hartu du txapela; gaur oraindik ere, biharamun galanta izango dute. Sarkozyk ere biharamun gaiztoegia bizitzeko aukera izango du gaurkoan; ziurrenik afaria kontrako eztarrira joango zitzaion, bigarren itzuliaren zai, mirariaren zai. Bruniren abestirik malenkoniotsuena lehendabizikoz entzun nahian dabil, nonbait…
Ni neu Arratiako parajeak ezagutzeko aukera izan dut oraingoan. Artean ospatu den RAID zoragarrian hartu nuen parte Pelayo taldekidearekin batera. 7 ordu inguruko lana egin
behar izan genuen iparorratzaren laguntzaz baliza bukaezinak aurkitzeko. Espeologo lanetan jarduteak Baltzolako galeria labur batera eraman gintuen. Han ere balizaren bila, erronka berrien bila, ilusio goxoen bila. Geu ere asebeteta.
Azken etxaflerotako bat Errealari eskaini nahi diot; puntuak banaka batzen ari da aspaldian, helburua erdietsita lehen mailan beste urte batez jarraituko du baina areriorik sentimentalena horren osasuntsu ikusita, Errealzale dexente ez zaigu asebete. Real Madrilek ere, badirudi, Cibelesen ospatuko duela liga garaipena, Txapeldunen Liga non ospatuko da? nork ospatuko du ? Astean gauza batzuk argituko zaizkigu, lokatzak uzten badu; zipristin marroiek jarraituko dute han eta hemen, zorioneko mele sasoitsutik ihesi, aske, eta lerden.
.
