Monthly Archives: martxoa 2013

Mar 22

Erosketa otzara kamera aurrean, aurtengo BH-Klipen

Arizmendiko DBHko ikasleak, grabaketarako materialarekin prest.

Gazteek ia jatorrizko duten lengoaia baten gogoeta egin eta sormena sustatzeko tresna ezin hobea bilakatu da BH-Klip, iaztik Debagoieneko Bigarren Hezkuntzako ikasle guztiei zabalik dagoen bideo lehiaketa. Lehen urtean proposamenak izandako harrera eta maila onarekin “sorpresa” hartu zutela dio Arizmendi Ikastolako Edurne Baltzategik eta aurten bosgarren urtea beteko dute. Apirilaren 24ra artekoa da lanak aurkezteko epea. Bideo kamera digital bana jasoko dute irabazleek.

Gogoeta kontsumoaz

“Kontsumoaren katea” da aurten bideo laburrak sortzeko gaia. “Kontsumoa prozesu moduan ulertzen da katearen bitartez” baina, baita ere, “kontsumoarekiko loturari buruzko gogoeta eragin gura” dela azaltzen du Bagarako Nagore Iraolak. Hain zuzen ere, Arizmendirekin batera Bagara Ekimena bidelagun izango du BH-Klip lehiaketak aurten (GOIENA Komunikazio Taldea, AZK eta Mondragon Unibertsitatearekin). Bagaran, Gureztatu ekimenaren bitartez, Arrasateko azoka biziberritzeko prozesuaren baitan sortutako ideia da kolaborazioa. Ekimenaren barruan badago azokan  haur eta gaztetxoen ikuspegia txertatzeko lantaldea (kide dira, besteak beste, Arizmendi bera, Herri Eskola, HUHEZI eta Txatxilipurdi elkartea) eta horrela tematika honetara gerturatu gura dituzte gazteak. “Kontsumo arduratsuaren ikuspegia landu gura da”, dio Iraolak eta “hortik tiraka ‘kontsumoaren katea’ gaia proposatu zen”. Gaian sakontzeko astia ere hartu dute. Joandako barikuan formazio saioa egin zuten Aretxabaletako HUHEZI fakultatean. Gaia landu zuten eta baita ere, unibertsitateko irakasleekin, gidoigintza eta teknikari buruzko irizpideak eskuratu zituzten ikasleek. Haiek, euren aldetik, pozarren hartzen dute urtero lehiaketa, Arizmendiko Batxilergo artistikoko Maite Beitia irakasleak azaltzen duenez. Ikus-hezkuntzak duen garrantziaren jabe da Beitia eta aitortzen du “egungo gazteak irudirako sen berezi batekin” datozela, “egunerokoa duten lengoaia dela”. Hala ere, “gakoa beti dago ideian” eta Beitiak zehazten du saiatzen direla “ikus-entzunezko lengoaia” erakusten; “teknikoki, askotan irakasleek baino gehiago jakiten” baitute ikasleek.

BH Klip 2013 from Goiena Komunikazio Taldea on Vimeo.

Lanak aurkezteko

Bigarren Hezkuntzako Debagoieneko ikasle guztiei zabalik dago sariketa. Gehienez, 2 minutuko bideoak egin behar dira kontsumoaren katea gaia hartuta eta otzara elementu moduan erabili behar da. Taldeak asko jota 3 kidek osatu beharko dituzte eta aholkatzen da musika norberarena ala baimenduna izatea. Youtube-era igo ala komunikazioa@arizmendikide.net-era bidali behar dira lanak apirilaren 24a baino lehen.

Mar 12

Abian da BH-Klip 2013: oinarriak

Captura de pantalla 2013-03-12 a la(s) 17.31.39

0. Xedea: Ikus-entzunezko labur bat sortzea.
1. Egilea:
Debagoieneko ikasleek har dezakete parte (DBH 3 eta 4 eta batxilergoko ikasleak). Lan bakoitzeko, gehienez, hiru lagun.
2. Lanaren ezaugarriak:

  •  Gaia: kontsumoaren katea.
  • Objektua: otarra.

3. Iraupena eta formatua:

  • 2 minutu gehienez.
  • Lana AVI edo WMV formatuan entregatu beharko da.

4. Formazioa:
Parte-hartzen dutenek aukera izango dute MUko Huheziko fakultatean (Aretxabaletan) formazio saio bat hartzeko gaiaren inguruan (BAGARAren eskutik) eta bideogintzaren inguruan (Ikus-entzunezko komunikazioa graduko irakasleen aldetik). Saioa martxoaren 15ean izango da, arratsaldez, eta bertako fakultatearen bisita ere antolatuko da. Partehartzeko, izena eman komunikazioa@arizmendikide.net helbidean martxoaren 14rako.

5. Epea:
Lana apirilaren 24rako entregatu behar da. Bi modutan helaraz daiteke:

  • Arizmendi Ikastolako idazkaritzan utzita edo postaz bertara bidalita. Arizmendi Ikastola (BHKlip, 2013) Otalora lizentziaduna, 8. 20.500 Arrasate.
  • Youtubera bideoa igo eta esteka helbide honetara bidaliz: komunikazioa@arizmendikide.net

6. Sariak:
Bi sari emango dira: Epaimahairen Saria eta Ikuslearen Saria.

  • Sari bakoitzean, partaide bakoitzarentzat bideo-kamera bana.
  • Ikuslearen Saria boto bidez aukeratuko da. Apirilaren 29tik maiatzaren 8ra arte bozkatu ahal izango da finalisten arteko onena Goiena Blog komunitateko BHKlipeko blogean.

7. Epaimahaia:
– MUko Ikus-entzunezo komunikazio graduko irakasle bat.
– Arizmendi Ikastolako ordezkari bat.
– GOIENA komunikazio taldeko ordezkari bat.
– AZK komunikazio taldeko ordezkari bat.
– BAGARA elkartearen ordezkari bat.
Epaimahaiak lanak baloratzeko irizpide hauek izango ditu kontuan:
– Orijinaltasuna.
– Teknikoki irudi, soinu eta muntaiaren egokitasuna.
– Gaiaren trataera.
– Objektua bideoan erabiltzea ez da ezinbestekoa, baina baloratu egingo da.
– Musika: ez da derrigorrezkoa egileek sortutakoa izatea, baina baloratu egingo da.

8. Eskubideak:

  •  Parte-hartzaileek ziurtatuko dute euren lanak ez dituela inoren eskubideak urratzen. Besteak beste, Creative commons lizentziapean musika deskargatzeko http://www.jamendo.com/es helbidean aukera handia dago.
  • Saria jasotzen duten bi lanak Arizmendi Ikastolaren esku geratuko dira, eta berea izango da lanoi eman dakiekeen erabilera.

9. Egileen datuak:

  • Lanaren izenburua artxiboan bertan jarri beharko da, eta gutunazal itxi baten izenburu bera eta barrua egileen izen-deiturak eta telefono zenbaki bat.
  • Lana Youtubera igota helaraziz gero, mezu bidez bidali datuok komunikazioa@arizmendikide.net helbidera.

10. Lehiaketa honetan parte hartzeak oinarri guztiak onartzea dakar.

Harremanetarako: 943 71 21 68 – 943 77 20 25
komunikazioa@arizmendikide.net www.arizmendi.eu