Ixutu dute txondorra. Iragarri bezala ekainaren 1ean eman zioten su txondorrari. Izan ere, aspaldiko hilabeteotan lanean ari dira Oñatiko “Txondorraren bueltan” egitasmoko kideak, garai bateko ikazkinek nola egiten zuten lan erakuste aldera. Hartarako txondor bat egokitu dute San Martin auzoko zuhaiztian, ermitaren atzean. Eta ondoan etxola bat, lehengo ikazkinek etxoletan pasatzen zituzten-eta ikatza egin bitarteko egunak.
Gure basoetako ikazkinen lana nolakoa zen jakiteko gogoa izanez gero, aukera ona da Oñatira joatea, eta San Martin ermita ondoko txondorra ikustea. Polita benetan. Eta baten batek ez badaki ere, puntako teknologiarik erabili gabe. Txondorraren bueltan ez dago inongo integilentzia artifizialik. Bestelako inteligentzia, bai, ugari.
Hemen duzu Oñatiko txondorraren argazki sorta txiki bat.
![atauri](https://blogak.goiena.eus/atauri/wp-content/authors/atauri-172.jpg)
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak.
Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez.
Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da.
Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.
Etiketak:
euskadi