1977 urtean sortu zen Maritxu Kajoi jaia Arrasaten txikiteroen Ama Birjinaren omenez. Geroztik birritan ez da ofizialki ospatu, Komisiñuak ez du antolatu eta: iaz eta aurten, hain zuzen ere.
Iaz jendeak kasu egin zion Komisiñuari, eta oso jende gutxi irten zen kalera dotore jantzita. Aurten, berriz, Komisiñua gora-behera, jendea irten eginda, erruz irten ere, baina hori bai, duela bi urte baino jende gutxiago. Eta, gainera, gazteak baino ez dira irten. Helduen arrastorik bat ere ez. Ofizialki ez, baina Maritxu Kajoi ospatu egin da, gazteek ederto ospatu dute eta.
Hemen duzu, bada, aurtengo argazki bilduma, Maritxu Kajoin egindako argazkiekin osatutakoa, eta, hemen, 2009-2020 urteetakoak.
atauri
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak. Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez. Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da. Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.
