Musuzikin zuen izena. Lagun baten katua zen. Lagunak Enrique du izena eta Ansoko Magoria ostatuan bizi zen. Ostatuko jabea zen. Aspaldion ez naiz berarekin izan, baina oso opor politak pasatu nituen bere etxean.
Argazkiko katua ez da Musuzikin, nik dakidala. Baina oso katu soziablea da eta kuskuseroa. Eskoriatzako Uritte baserrian bizi da. Iazko ekainean han zen, Joxe Aranzabal eta biok bisitan joan ginenean. Uritte Joxeren amaren baserria da.
Igandean argazki zaharrak antolatzeari ekin eta horra hor non azaldu zen Uritteko katua. Oroitzapen onak ekarri zizkidan. Haren izenik jakin ez eta Musuzikin deitzea pentsatu nuen. Uritteko musuzikina, alegia.
atauri
Joxefe naiz. Aspaldian horrela esaten didate etxean eta lagunartean. Jaiotzean, ordea, Jose Felix jarri zidaten izena eta Diaz de Tuesta eta Martinez abizenak. Makina bat urte daramat argazkiak egiten, plazer hutsagatik, gustatzen zaidalako, alegia. Aspaldiko hamar bat urteotan, argazkilaritza berrian hasi nintzen eta geroztik Kodak eta Fujifilm pelikulak erabiltzeari utzi diot. Etxea argazki albumez beteta daukat, eta ordenagailua, irudi digitalez. Hiru argazki liburutan parte hartu dut. Batzuetan editore moduan. Beste batzuetan editore eta argazkilari moduan. Baina nire argazkiak, batez ere, sarean erakusten ditut, gaur egun, nire ustez, Internet baita munduko erakusketa aretorik handiena eta, ziur aski, onena. Jendearengana iristeko aretorik onena bai, behintzat. Sarean nire goitizena Atauri da. Nire curriculum profesionala sarean dago. Beraz, norbaitek nire ibilbide profesionalaren berri jakin nahi badu sareko bilatzaileetara jo eta erraz samar aurkituko du daturen bat edo beste bere jakin mina asetzeko.