Honekin hasiera emango diot noizean behin egingo dudan gomendio sail bati. Nire asmoa gurean hai ezagunak ez diren taldeak ezagutaraztea izango da, bereziki punk egiten dutenak. Hasteko, Poloniako nire talde kutuna aurkeztuko dut: Pidzama Porno.
Krzysztofa Grabowski-k eta Andrzej Kozakiewicz-ek 1.987an sortu zuten talde hau, Poznan-en, eta harrezkero 10 disko utzi dizkigute, azkena 2.004an kaleratua.
Goiko lehen bideoan (Wirtualni chłopcy) taldearen alde kañeroa eta umoretsua uztartuta ikus daitezke. Punk garbiaz gain, ordea, ska eta reggae doinuekin ere maiz jokatzen dute, eta ez diote muzin egiten akordeoia eta beste tresna tradizionalagoak erabiltzeari, doinu oso pertsonala lortuz. Benetan, kriston taldea, ordutan eta ordutan entzun daitekeena.
Nire eskuetara iritsi zen lehen diskoa Futurista izan zen, eta lehen momentutik euren erritmoetan itsatsita geratu nintzen. Ezinbestekoen artean nik Złodzieje zapalniczek eta Ulice jak stygmaty ere kokatuko nituzke.
Egia esan, harritzekoa da zenbat talde punk on dagoen Polonian eta, oro har, Europa komunista ohian. Gehiago ekarriko dut, apurka-apurka, lerro hauetara.
Norbaitek zalantzarik badu talde honek Polonian duen garrantziaz, fija zaitezte ondo zuzenekoan, euren ereserkietako bat den Outsider kantarekin. On egin!
