Visací Zámek
Orain arteko taldeei buruz informazioa lortzea ez zen hain zaila, hor egon da txintxo-txintxo nire Wikipedia maitea (badakit euskaraz ere badagoela, baina nekez topatuko duzu, esaterako, japoniar punk talderen bati buruzko informazioa bertan…); oraingo honetan, ordea, txekiar talde itzela dakarkizuet, Visací Zámek, eta ezinezkoa izan dut ulertzen dudan hizkuntza batean ezer topatzea. Egun bi barru hango pertsona berezi baten urtebetetzea da, baina ez dut uste webgune osoa itzultzeko eskatzerik izango dudanik…
Beraz, haiei buruz informazio gutxi. Atera ahal izan dudanagatik, 1982an kokatzen dira haien hastapenak, eta ez dago zalantzarik Txekiako punk mugimenduaren aitzindari eta talderik garrantzitsuenetakoa izan direla. Hor dago 1993an Petr Zelenkak haiei buruz egin zuen filma.
Aurreko batean The Blue Hearts trenez iritsi bazitzaigun, pentsatu behar dugu Visací Zámek komunismo garaian agertzen zaigula, eta agian horregatik aukeratu dute orduko gizartean pisu handiagoa zuen garraioa: traktorea. Begira bestela bideotxo honetan…
Txekiar talde batzuk ezagutzeko parada izan dut, eta hauengan ere nabarmentzen dira hangoen ezaugarri batzuk: umore etengabea eta noizean behin euren musika elementu eta doinu bereziez zipristintzea. Oraingoan, ironiaren adibide, hemen duzue azken boladan nire bideo kutuna bilakatu den “Známka punku” hau…
