Haur izandakoak

Zuek denok, zuen pribilegioei errugabeen odolaz defendatzen dituzuenok, moral bakarra dirua duzuenok, zuen ongizate huts eta neurririk gabeari eusteko mundu honetako deseredatuak gupidarik gabe larrutu edo akabatzen dituzuenok, jabetzaren gezurra saltzen duzuenok, indarkeria mota oro sustatzen duzuen burges hiltzaileok; baita zuek ere, ezikusiarena eginez sarraskiaren partaide ez zaretela uste duzuenok, lan zikina besteei utziz eroso bizitzeko eskubidearen jabe sentitzen zaretenok, GKE-ei diru apurtxoa emanez etengabeko lapurreta zuritzen duzuenok, burgeskerian eroritako langileok; garai batean mundu hobe eta bidezkoarekin, bakearekin, gosearen amaierarekin amesten zenuten haurrak izan zineten; edo hori esan zenuten eskolan, behintzat. Non geratu ziren haur horiek? Ala ordurako demagogia eta zuzentasun politikoa ondo ikasitako ume otzanak baino ez ziren? Noiz hil zenuten betiko berdintasun sena zuen bihotzetan, inoiz izan bazenuten? Noiz jarri zenizkieten zapia begietan eta kotoiak belarrietan zuen barneko haur horiei? Zeuek zaretelako munduari horrela iraunarazten diozuenok eta orain zuen haurrei gezur berberak saltzen dizkiezuenok, euren gurasoen bihotz onean sinets dezaten, mundua holakoa berez dela irents dezaten, mundua aldatzeko zerutik iritsitako indar ezezagunen batek etorri behar duela barneratu eta otoitzetan zuen kontzientzia garbi dezaten, txiroa izateko errua txiroena dela eta zuen karitateari esker salbatzen direla sinets dezaten, zuen bideari jarraituz ezer txarrik egiten ez dutela pentsa dezaten, eurak ere, munduko zapaltzaileak izanda, salbatzaile senti daitezen. Hurrengo hiltzaileak izan daitezen, zuen oinordekotzak bermatutako pribilegioei esker.

asel