Goizean altxatu, telebista piztu, eta entzun dudan lehen albisteak zur eta lur utzi nau: aurtengo Nobel saria Barack Obamari eman diote! Berehala hasi naiz hausnarketan eta zera galdetu diot neure buruari: zergatik ez zioten, bada, lehenago Bushi eman? Zer egin du munduko bakearen alde bere aurrekoak egin ez zuenik? Inperioaren armadak Iraken jarraitzen du, Afganistanera hiltzaile uniformatu gehiago bidali nahi ditu, Kubak blokeatuta jarraitzen du (bai, keinuren bat egin du, estilo oso estatubatuarrean: irribarre zuria eta atzean fusila), Honduraseko estatu kolpea baimendu du (hitzak hitz, baimendu ez balu aspaldian egongo zen Zelaya dagokion lekuan, eta Micheletti nekez ausartuko zen kolpea bera ematen CIAren onarpena izan barik)…
Ez dut inoiz sari horietan sinistu, baina lehen itxurak gordetzen saiatzen ziren, eta bake prozesuetako buruak izendatu ohi zituzten, behintzat. Beraz, berriz diot: zer egin du urte erdi honetan Barack Obama jaunak sari hori “merezitzeko”? Argi dago publizista oso onak dauzkala, hauteskundeetan erakutsi legez. Eta horiek dira etsairik txarrenak, jendeak laguntzat hartzen dituen borreroak.
