2014ko otsailaren 22an, Zahar-Berriko eta Berriketaneko taldeko 16 lagunek, irteera kultural oso interesgarria egin genuen.
Lehenengo Ibarraundi museoko etnografia erakusketan, bertako istorialariek, garai baten emakumeek lihogintzan, gizonak burdingintzan, eliztarrak liburugintzan nola aritzen ziren azaldu ziguten. Baita orain dela 100 urte baserrietan bizi zuten bizimodu ezberdinaz ere jabetu ginen. Orduan ez zegoen erlojurik, telebistarik, ez eta mugikorrik ere eta denbora gehiago hartzen zuten ipuinak kontatzeko. Gainera naturarekin harreman estua zutenez lasaiago bizi ziren eta honetatik ondorio bat atera genuen. Hau da, gure arbasoengandik zer ikasia badugula.
Debagoieneko berbalagunak Ibarraundi museoaren aurrealdean.
Baina guztioi gehien harritu gintuena Zubiateko labea izan zen. Eskoriatza sarreran dago eta ez genekien horrelako erakina zegoenik ere. Bisitariok bertatik bertara ezagutu genituen XIX. mendeko buztingintza lantegi bateko aretoa, buztingileen lanabesak, ontzien tipologiak eta horien erabilerak… Bidaia honetan, labea da protagonista eta ardatz nagusia eta bere barnera sartzeko aukera izan genuen. Benetan ikusgarria!
