Erregetako krossa dela diote oraindik; aitzitik ez da dagoeneko urtarrilaren 6an ospatzen. Badira urte gutxi batzuk gainera, ohiko zirkuitu korapilotsua itxuraldatu zutela hamar kilometroko luzera atraktiboa erdiesteko. Izaera herrikoia ere hartru du; atleta federatuek ezezik, bestelako korrikazaleek ere har dezakete parte Gimnastikako lasterketan. Ondorioz, xarma galdua du, ene iritsi apalean, horren gustukua izan dudan Erregetako krossak. Atletismo usaia zerion lasterketa zoragarria, “running” fenomenoak ilustratzen du gaur egun; alegia, modako running delakoa ospatzen da Zurriolan. Nere etsipenerako, lasterketa herrikoi bat gehiago Donostiarako.
Eta egutegietako egunak haserretzerainoko erabakiak hartzen dutenek bideratuta edo, Nazioarteko maila duten bi lasterketa ospatu dira igande berean. Arestian aipatutako Donostiakoa eta mundu mailan horren pisu handia duen Zornotzako Crossa alegia. Azkoitia Azpeitia eta Donsotiako maratoi erdiearekin bezalaxe, egutegi atletikoan ganora gutxi. Are gutxiago Uliakoa Euskadiko txapelketa izendatzean. Korrikalari euskaldun asko ( Euskadikoak, ez EHerrikoak) falta ziren atzo Donostian. Zornotzan aurtengoan ikusitakoak harritu ere egin nau; ohi baino maila txikiagoa antzeman dut Jauregiberriko zelaietan. Enguse Amloson eritrearra, Vallecaseco San Silbesteran bezalaxe, izan zen azkarrena. Emakumerik azkarrena berriz, Jessica Martin ingelesa izan zen.
Donostiak leku ikusgarri ugari ditu. Gipuzkoako Orientazio Taldeak antolatuta orientazio lasterketa ederra ospatu zen igande goizez. Alde Zaharra eta Urgul mendian zehar ibili behar izan ginen baliza ezkutuen bila. Erakargarri egin zitzaidan zinez, Urgul mendiko pasabide, tunel eta antzerako eraikinen barna balizen bila ibiltzea. Goizeko lehen orduetako hotz ikaragarria ez zen, inondik inora, aitzakia izan gerturatutako 500 bat partehartzaileentzat.
Baliza jakin batzuetan ez nintzen oso fin ibili; beharbada, zapatu gaueko lo orduak ez zirelako ganorazkoak izan. Irazan antzerki taldeaen emanaldi ederra berandu samar amaitu ostean, ezin izan nintzen nahi bezain laster oheratu. Dena den, merezi izan zuen Santana antzokiko emanaldiak eta zer esanik ez, alabaren jardunak. Chapo!!
Gipuzkoako hiriburutik gertu, Usurbilen, izan da kirolarekin zerikusirik ez duen konturik. Esperantzaz bakea eta bizikidetza aldarrikatzeko konpromezuaz joan zen bertara aitta. Berak dioen moduan “gerrako lagunak” agurtzearekin batera, etorkizunari leiho bat zabaltzera.
Normalatasunera egin dugu jauzi gaurkoan. Egunerokotasunari, berriro ere, neurria hartzera behartuak gaude nonbait. Eta izan bedi urte oparoa, goazen bada etorkizunari leiho bat zabaltzera. Ah!! Eta eutsi gordetzen duzun xarma horri.
