Korpusti jai beroegiak izan ditugu aurten ere. Hezetasunak are beroagoa egin zuen gainera, Gorbata eta soineko dotoreenen asteburua iritsi zen herrira; eta eguraldia eguzkitsu azaldu zen modelito ezberdinen mesederako. Baina asteburuko lehen modelitoak urdin kolorez bete ziren zapatu goizez. Antxintxiketan kirol elkarteak antolatutako haurren lasterketa arrakastasuek busti baitzituzten urdinez jai giroko lehen urratsak. Beste behin ere, haurren borondate eta ahalegina ordaindu ezin diren kontzeptu korpuztiarrak bilakatu ziren ganoraz.
Plazako hesi horiek bertan iraun zuten arratsaldean izango zen lasterketari so. Haurrek etxerako bidea hartu bazuten ere, Euskal Herriko korrikalri onentsuenei harrera egiteko ordua hurbiltzen hasia zen. Eta halaxe izan zen, zerutik lehen ttanttak erortzen hasiak ziren horretan heldu baitzen lehen korrikalaria Gaztelukuan zabaldutako geure bulego inprobisatura. Hileta elizkizunei errespetuzko keinu bat azaldu ostean, ekin genion korrikalariak aurkezteari; lasterketa ederra izan genuen herriko kaleetan zehar eta giroa berriro ere, mundiala.
Lasterketa osteko derrigorrezko afaria ere horrelakoa izan zen, mundiala. Konpainia ederrean eta Korpusti jaiei imintzioka edo, proiektu aingerutarrekin dantzan hasi ginen sutsu. Aitzitik, oraindik ere, oinarri handirik gabeko proposamenak izan daitezkeelakoan nago. Nork jakin, agian, datorren igandeko lasterketa osteko bazkarian bukatuko dugu elkarrizketa.
Igandean ez zen lasterketarik izan Oñatiko kaleetan. San Kristobal gidarien zaindaria izanik, ederto markatu zuen prozesioaren erritmo motela; beti ere, San Miel eta San Sebastianek horrela aginduta. Belarra lurrean eta soineko eta gorbatak han eta hemen, Korpusti jaiak ospatu zituen bertan bizi den txantxikuarrak eta kanpoan bizi den oñatiarrak.
Dantzarien arku dantza korapiltsuak laino beltzak ekarri zituen geurera. Ekaitza hurbiltzen hasia zen Oñatira. Bero zakarregiei zuzendutako erantzun trumoitsuek jarri zituzten doinu bustiak pentagrametan. Horrelakoa izaten baita usu Korpusti sasoia; bero zakar eta trumoien konpartsen altzora ekoiztutakoa ei da. Ondo izan.
