Irudi aldatuta aurkeztu zaigu Ezker Batua-Berdeak apirilaren 17ko Legebiltzarrerako hauteskundeetarako.

Marka berrian EB-Berdeei eman diote garrantzia eta IUri kendu (ez ordea Interneteko helbidean: www.ezkerbatua-izquierdaunida.org izaten jarraitzen du-eta). Aukeratutako koloreak, nola ez, gorria, berdea eta beltza

Garbia, egungo gustura egindakoa, arrazionala eta hainbat euskarritan ondo erreproduzitzeko modukoa da ikur berria. Hala ere, zail samarra iruditu zait eta akaso txarrena: hotza eta arkitektonikoegia.

Ezkerreko alderdi batek beharko lukeen pasioa eta berotasunen ukitua falta zaizkiola uste dut.

Dena dela, onerako aldaketa izango dela seguru nago. Oraingoa une ezin hobea izan daiteke logo berriaren erabilerarekin batera ezkerra batzen ez ezik irudia batzen ere hasiko balira EBn.

Orain arteko nortasun grafikoa norabide gabekoa eta galdua izan da Ezker Batuarena. Ikusi, bestela, azkenaldian argitaratu dituzten kartel batzuk:

Badago elementu komunik tipografian, koloreen erabileran, ilustratzeko edo mezua botatzeko moduan?… Ez askorik, behintzat. Aldi bakoitzean bide desberdinetik jo izan dute, inongo batasun, lotura edo jarraipen barik.

Orain hamar urte dela, etorkizuneko museo industriala izango zenaren egitasmoaren lehenengo pauso moduan, Arrasateko Udalak erakusketa bat antolatzea erabaki zuen. Erakusketaren berri emango zuten horma-irudia eta esku-orriak diseinatzea eskatu zidaten; hala, diseinua egin eta leloa ere proposatu nien: Made in Arrasate.

Material grafiko mordoa eta ederra zegoen aukeran; batez ere, Union Cerrajerako antzinako zuri-beltzezko argazkiak gogoratzen ditut. Gerra aurreko argazki bat apartatu genuen kanpainaren oinarri bezala.

Istorio honen bigarren atala orain dela aste batzuk gertatu da, Control Publicidad aldizkaria begiratzen nenbilela. Aldizkari horretan, Bartzelonako Focus publizitate agentziaren iragarkia ageri zen orri osoa hartuaz (eskumako irudia). Huraxe ikusita, aho zabalik geratu nintzen.

Iragarkia ikusi bezain laster, hamar urte lehenago egindako horma-irudi harekin gogoratu nintzen (ezkerreko irudia). Kasu bien arteko elementuen antz handiak harritu ninduen: argazkiaren estiloa, aukeratutako koloreak, konposizioa, formak,….

Itxura baten, hamar urte dela bere baritatxoarekin ukitu ninduen inspirazioa, gero, Bartzelona aldera joan zen bizi izatera.