Blogari

Data: 2005(e)ko martxoaren 8a Egilea: piperrautsa

Lagun bati entzun berri diot, aste betean pasatu zela ‘blog’ hitza ez ezagutzetik alde guztietan entzutera. Hark iturri zuen Joxe Aranzabalen liburua eta honen aurkezpenak hedabideetan izan duen oihartzuna. Agian zuk beste iturri batetik jaso duzu berba magikoaren berri. Gerta dakizuke oraindik aro kretazikoan egotea, blog berba ezagutu gabe, baina horrek ez dizu asko iraungo. AEBtan iaz berbarik sonatuena izan omen zen, Irak-eta baino areago, eta dagoeneko sukarrak jo gaitu gu ere.

Blog-a da tresna bat sarean jartzeko ugazabak nahi duena, testuak, irudiak, soinuak, loturak… Eta edonor izan daiteke blog baten ugazaba, berdin pertsona edo talde, zu edo ni. Beno, ni dagoeneko hasi naiz blogari, asteon. Izan ere, blogintza iritsi da goiena.net atarira, eta hor ausartu gara batzuk lehen urratsak egitera.

Eta zer da, bada, blog-a?

Nire blogak zutabe honen izen bera du, piperrautsa, eta hemengo antzera arituko naiz. Hori bai, bi pizgarri handirekin. Batetik, arituko naiz formaz libreago, hemen lotuta bainago neurri eta maiztasun jakinetara. Eta bestetik, jaso ahal izango ditut zuen iritziak hemen ez bezala. Zutabea abiatu nuenean, eskaini nuen helbide bat, baina apenas erabili duzuen. Orain samur daukazue kontua: sartu blogean eta erantzun. Bota iritziak edo proposamenak. Han sortzen den trukeak izango du isla gero hemen, paperezko Piperrautsan.

Kategoriak Sailkatugabeak | Etiketak | 3 iruzkin

Elurra, antibiotiko

Data: 2005(e)ko martxoaren 6a Egilea: piperrautsa

Herri txikiko kaletarra naiz, ez gatz eta ez berakatz. Umetan ez nuen jaso ez hiritarren modernotasuna, eta ez baserritarren jakinduria. Geroztik, beti sentitu izan naiz hiritar petoak baino arloteago, eta baserritar petoak baino inuzenteago.

Duela hamar urte hautua egin nuen eta, harrezkero, baserrian bizi naiz. Ez nuen helburu lurrera itzultzea, antzinako hippyen modura, baina akordatu orduko bihurtu naiz mahastizain, txakolinetarako 2.300 mahatsondoren arduradun.

Eta ikasi egin behar izan dut, adi egon batak eta besteak esaten zuenari, gero batazbestekoa atera eta nirea egiteko.

Ikasi dut, adibidez, lurrak beregan duela bizia eta heriotza, eta eguraldiak areagotu egiten diola baterako edo besterako joera. Udako berotan heltzen dira fruituak, eta garatzen gaitzak. Neguak ez baditu akabatzen hauen eragileak, onddo, intsektu edo bakteriak, hurrengo udan indartsuago agertzen dira, uztan galerak eraginez.

Horregatik diote elurra dela antibiotikorik onena lurrarentzat. Lurrari ezartzen dio azal hotza, eta irautea galarazten die lur azpiko izaki kaltegarriei. Horrela, negu honen arabera, 2005ak urte ona behar luke izan nekazarientzat. Neuk ere esperantza ona daukat hurrengo uztarako.

Gogoan izan beza hau, elurrarekin kexu denak.

Kategoriak Sailkatugabeak | Etiketak | Utzi iruzkina

Gipuzkoa, nora zoaz?

Data: 2005(e)ko martxoaren 4a Egilea: piperrautsa

Astigarragan izan berri naiz afaltzen, Donostia aldeko lagunekin. Eta irten zen probintzia/hiriburu tentsioa. Nik nioen Gipuzkoa ari dela jartzen donostiarregi, Debagoiena eta barnealdea ahaztuta, herrialde berez orekatua ari dela desorekatzen, hiribururantz. Haiek ezetz, keba, alderantziz, Donostia dela aspaldian galtzaile, Jaurlaritzak gastatzen duelako diru guztia Bilbon, botoak non dirua han.

Eta etorri zitzaidan gogora asteon berton Diario Vascok argitaratutakoa, nola Gipuzkoa ari den atzean gelditzen Bizkaiarekiko, eta ezinbestekoak dituela Pasaian kanpoko portua, Y trenbidea, eta ez dakit zenbait hormigoizko lantzar. Horiek guztiak egiten ez badira, Gipuzkoak betirako galduko omen du modernitaterako aukera.

Bi hausnarketa. Bat, zenbat gelditzen zaigun oraindik nazio izateko. Eta bi, lurralde abertzaleenak zenbateraino edaten duen Diario Vascotik.

Kategoriak Sailkatugabeak | Etiketak | 4 iruzkin

Sinatu

Data: 2005(e)ko martxoaren 3a Egilea: piperrautsa

Dagoeneko ofiziala da apirilaren 17ko deia, Legebiltzarreko hauteskundeetarako. Aldiz, ez dago garbi ea aukera guztiak aurkeztu ahal izango diren egun horretan. Eta inplikatutako aldeak eztabaida antzutan ari diren bitartean, hiritar talde batek heldu dio gaiari serio, eta aurkeztu du Aukera Guztiak izeneko ekimena.

Talde honek bultzatu nahi du hautesle elkarte bat, honen bidez zerrendak aurkeztu ahal izateko hauteskundeetan. Ez dute proiektu politiko bat bultzatzen, bakarrik nahi dute bermatu Batasuna ohiak izango duela aurkezteko bigarren aukera bat, baldin eta eskubide zuzena ukatzen badiote.

Ez dakit justu nola egingo litzatekeen hau, lehenengo osatu zerrenda garbiak lege injustuaren galbahea pasatzeko, eta gero eserlekuak eskuz aldatu. Baina, formalidadeak alde batera, ahaleginak merezi du laguntasuna. Ikusita nekez gauzatuko direla soluzio hobeak, modu eragingarria da apirileko deialdiaren kalitatea hobetzeko.

Ahaleginak merezi du laguntasuna

Lagundu nahi duenak, hauxe egin behar du: toki jakin batzuetara hurbildu eta bere sinadura eman Aukera Guztiak elkartearen alde. Debagoienean Arrasateko Udala eta notaritza dira izendatutako toki bakarrak. Eta ez dago denbora asko, martxoaren 11 baita azken eguna.

Ni joango naiz sinatzera, zalantzarik gabe. Botoa nori eman, beste kontu bat da. Baina nahi dut eskura egon daitezen aukera guztiak.

Kategoriak Sailkatugabeak | Etiketak | Iruzkin 1