Eraiki

Data: 2005(e)ko ekainaren 3a Egilea: piperrautsa

Arrasaten bi mila etxebizitzatik gora eraikiko da hurrengo urteetan, Oñatin milatik gora, Debagoiena osoan bost mila baino gehiago… Datu deigarriak eman zituen, aurreko GOIENKARIAn, etxebizitzen gehigarriak. Norentzat?

Deigarria da horrenbeste etxe berri eraikitzea, biztanle kopuruak ez duenean gora egiten. Etxe berrien zati batek ordezkatuko ditu botatako zaharrak, baina gehienak izango dira berri-berriak, eta handitu egingo dute etxebizitzen parkea. Nork erosiko ditu horiek?

Ze, ibarraren garapenak ez du ekarri populazioaren hazkunderik, eta autopistak erraztu egingo du joan-etorria. Beraz, areagotu egin daiteke hemen lan egin eta kanpoan bizitzeko joera. Alferrik egingo dira bost mila etxebizitza berri ez bada erakargarriago bihurtzen ibarrean bizitzea kanpokoentzat.

Deigarri egin zait babes ofizial/prezio mugatukoen kopuru urria, (1.400), eta bi heren baino gehiago libreak izatea. Kontuak eginda, metro karratu librea ordaintzen bada 3.000 euro, irteten da 1.000 milioi euro inguru gastatuko direla etxe libreetan, eta beste 100 milioitik gora babestuetan. Kopuru horien ia %10 joango da zerga, notaritza eta erregistrotan. Sekulako pagotxa zenbaitentzat!

Nori mesede?

Eta deigarri egin zait ez aipatzea etxebizitza txikiak. Barre egin zaie 30 metroko apartamentuei, baina soluzio ona da eskariaren zati bat asetzeko eta presioa/prezioa jaisteko.

Eta txikiak?

Kategoriak Sailkatugabeak | Etiketak | 2 iruzkin

Matxinoak Europan

Data: 2005(e)ko ekainaren 1a Egilea: piperrautsa

Herbehereetan ere, Frantzian bezala, ezetzak irten du garaile, Europako itunaren erreferendumean. Badira bi kasuen artean antzekotasunak eta ezberdintasunak, baina ezaugarri komuna hau da: alderdi nagusiek eta erankundeek baietza eskatu arren, herritarrek ezetza hobetsi dute. Haustura, gizartearen eta politikarien artean? Barregarri samar ari dira Frantzian ezetzaren aldeko liderrak, bakoitzak eraman guran bere errota politikora matxinadaren ur handiak. Ahaztu nahi ditut Le Penen faxistak, frantzes ultranazionalistak, Turkiaren aurkako xenofoboak, ezker muturreko hiper-iraultzaileak, eta beti gauza guztien kontra daudenak. Eta gogoratu kritiko direnak Europarekin, indartu ditzakeelako joera ultraliberalak eta urrundu erabaki guneak; baita, kritiko direnak alderdietako agintariekin, galdua dutelako sintonia baseekin eta herritarrekin; eta, batez ere, kritiko direnak erakundeetako agintariekin, ez dutelako entzuten, ez dutelako ikasten, irabazia dutelako hautesleen matxinada behingoz.

Joera hauek nabarmenagoak izan dira Herbehereetan, gizarte modernoenetakoa den honek beldurra hartu baitio Bruselatik etor daitekeen lege zaparradari, bere lorpenak mugatzea ekar lezakeelako. Oso ondo bizi ziren euroa baino lehen, eta ez dira hobeto bizi euroarekin. Zertan joan aurrerago? Agintariek diotelako bakarrik? Nee!

Ez dakit emaitza hauek pikutara bialduko ote duten amets europarra. Niri lelo bat gelditu zait buruan: posible da beste Europa bat.

Bukatzeko, ez dut ahaztu nahi ezetzaren aldeko sarea osatzean, nolako garrantzia izan duten posta elektronikoak, blogak, esamesak, eta kostu txikiko teknologia puntakoak. Duda barik, tresna berriekin egingo dira 21. mendean iraultza bigunak, mon ami!

Kategoriak Sailkatugabeak | Etiketak | Utzi iruzkina

Lau katu eta bigarren!

Data: 2005(e)ko maiatzaren 30a Egilea: piperrautsa

Ez dakit teknofobo ote naizen, baina bai arrotz samar sentitzen naizela teknofiloen artean eta hotz antzean uzten nauela azken katxarritoaren merkaturatzeak.

Horregatik azaldu nahi duk gaur nire lilura erabatekoa, Gariren proposamenak izan duen arrakastaren aurrean. Nahikoa izan da lau katuok biltzea gidari onaren atzean, zatar uzteko Gipuzkoako Aldundi ahalguztiduna. Zorionak Gari/Joxe, eta animo katu guztiei! Blogari batuak eta ondo gidatuak, inoiz ez gara izango zanpatuak!

Kategoriak Sailkatugabeak | Etiketak | 2 iruzkin

Ardatzak

Data: 2005(e)ko maiatzaren 28a Egilea: piperrautsa

Inauguratu dute Ormaiztegitik Zumarragarako errepidea, Beasain-Durango ardatzaren zatia. Eta niri berritu egin zait zauria, ikusita errepide honekin gertatzen ari dena.

Aspaldiko errepide plangintzetan jotzen zen lehentasunezko lotzea errepidez Gipuzkoa eta Bizkaia barnealdetik. Errepide berriak lotuko zituen bi ardatz nagusi, Donostia-Beasain eta Durango-Bilbo, saihestuz Deskarga, Elgeta eta Kanpanzarreko zailtasunak, eta irekiko zizkion Debagoienari Gipuzkoako eta Bizkaiko ateak.

Lehentasun zaharra

Lanak hasi, hasi ziren: Beasaindik Ormaiztegira, Epeleko zatia, Elorrioko saihesbidea… Baina berehala etorri ziren atzerapenak. Lehian sartu zen Etxegarateko lau erreiena eta, iskanbila askoren bueltan, obra biak batera bultzatzeko konpromisoa hartu zuen Aldundiak. Etxegaratekoa amaituta, handik urte betera eta neke handiz iritsi da beste lana Zumarragaraino, lehen aurreikuspenak baino bost bat urte beranduago. Eta beste bost bat urte beharko omen ditu Zumarragatik Bergarara iristeko.

Leihakide berria

Konparatu geldotasun hau Eibar-Gasteiz autopistako lanen ziztu biziarekin, eta argi ikusiko duzue non jarri duten agintariek lehentasuna. EAE egituratzeko garrantzi handiagoa duelako autopistak, Beasain-Durango ardatzak baino? Edo autopistak ordainsaria duelako, eta besteak ez?

Hautu garbia

Bide batez, Bizkaia aldean eperik ere ez dago Durango-Epele zatia egiteko.

Kategoriak Sailkatugabeak | Etiketak | Utzi iruzkina

Aldundia eta blogari ikusezinak

Data: 2005(e)ko maiatzaren 26a Egilea: piperrautsa

Sentitzen dut, baina batxiller ikasitakoa naiz ikastetxe espainoletan, eta nire erreferentzia zaharrak hangoak ditut. Gogoratzen ez dudan poeta baten esaldi hau gogoratzen dut, madarikatuz

*esa España que desprecia cuanto ignora*.

Gipuzkoar askorentzat -eta Aldundiarentzat- lurraldea mugatuta dago Hondarribia-Tolosa-Zarautz triangeluaren barruan. Haratagokoa ez da ezagutzen, beraz ez du merezi. Non dago gure poeta salataria?

Bigarren egitate negargarria: euskarak ikusezin bihurtzen ditu pertsonak eta gauzak, Harry Potterren tapakia bailitzan. Adibide lazgarria: Kutxako lankide bat, Donostian jaioa, ama Oriokoa. Bere etxera neramala Aiete inguruan, esan nion:

  • Ahí vive Mikel Laboa.

Eta berak erantzun:

  • ¿QUE ES? ¿DE KUTXA?

Debarroan egiten badira blogak euskaraz, bi aldiz ez dira esistitzen: urruntasunagatik behin, eta hizkuntzagatik beste behin.

Hemen kopiatzen dut Gipuzkoako Aldundiari zuzendu diogun gutuna:

Gipuzkoako Foru Aldundia oker dabil

Apirilaren hondarrean Gipuzkoako Foru Aldundiak hitzarmen bat egin zuen El
Diario Vasco egunkariarekin, blog lehiaketa bat antolatzeko.
http://blogs.diariovasco.com/ Ez zituen aintzat hartu ordura arte Gipuzkoan
bertan blogintzan egindako ahalegin oparoak, eta DV-rekin ezkondu zen.

Nork bere ezkontideak hautatzen ditu, eta Gipuzkoako Foru Aldundiak eskubide
osoa du berea aukeratzeko. Hautuak, ordea, sortu zituen protesta batzuk,
adibidez: Blog&roll lehiaketa printzipioz gaztelania hutsez izan behar
zelako; edo saritzea nahi zutelako blog onena, baina horretarako
ezinbestekoa zelako blog hori Diariovasco.com-en egitea; edo, oro har,
aitzindarien lana kontuan hartzen ez zelako.

Okerrena, baina, orain dator: Gipuzkoako Foru Aldundiaren organo ofiziala
hasi da hainbat informazio banatzen, eta hor aldatu egiten da euskal
blogintzaren historia, DV-ri emateko ez daukan aitzindaritza. Eta hori ez
diogu onartuko.

Gipuzkoako Foru Aldundiak antolatu du E-gobernua eta hiritarren
parte-hartzea, jardunaldi batzuk, non gonbidatu dituen Europa Press-eko
ordezkari bat, eta beste bat DV-koa, teknologia berriez hitz egiteko. Eta
DV-ren ordezkaria aurkezterakoan, hauxe dio: ³Diariovasco.com fue el primer
medio digital en incorporar foros de discusión sin pre-moderación, y ha sido
también el primero en poner a disposición de sus usuarios un servicio de
blogs².

Blogei dagokienez, hori ez da egia. Gipuzkoako Foru Aldundiak eta DV-k
badakite Euskal Herrian lehen bloga, Sustatu, 2001ean kaleratu zela,
Code&Syntax (Eibar) eta Goiena (Debagoiena) enpresek sortua. Lehen blog
zerbitzua Eibar.org erakundeak sortu zuela 2004ko uztailean. Goiena.net-ek
2005eko otsailaren 22an aurkeztu zuela bere blog komunitatea Koldo Mitxelena
kultura gunean, Donostian. Eta gero etorri zela DV bere blog zerbitzuekin.
BainaŠ, hor egon liteke aitortu gabeko koska Gipuzkoako Diputazioarentzat,
blog horiek guztiak euskaraz daudelako. Horiek ez ezik, beste asko ere, 170
blogetik gora, euskaraz daude, eta Aurki.com albiste biltzaileak jasotzen
ditu uneoro.

Bada beste bidegabekeria bat egin duena Gipuzkoako Diputazioak eta da hauxe:
asko gara gaudenak izena emanda e-postazko buletin batera, Gipuzkoa.net
atari ofizialean zer dagoen berri jasotzeko. Oraingo astean etorri denak,
konpentsatzeko-edo, berritasunetan zekarren lotura bat: Goiena.net.
Berritasuna, non eta 2003ko udazkenetik dabilenean ekimen hau sarean!. Nola
hartuko gaituzte kontuan Deba ibarrean, San Vicente de la Barqueraren
parean… Horientzat Gipuzkoa hasten da DV-ko orrietan eta amaitzen da
Igara-Ibaeta inguruan.

Gipuzkoako Foru Aldundiak aukeratzea dauka nahi dituen aliatuak, baina,
mesedez, ez dezala historia faltseatu eta izan dezala errespetu apur bat
punta-puntako teknologia erabiliz euskarazko ekimen berriak bultzatzen
dihardutenekiko.

Joxe Aranzabal, ŒEibar.Org¹ eta ŒGoiena.Net¹ komunitateetako blogarien
izenean

Kategoriak Sailkatugabeak | Etiketak | Utzi iruzkina

Anbulategitik ihesi

Data: 2005(e)ko maiatzaren 23a Egilea: piperrautsa

Goizeko 11:20etan neukan hitzordua Durangoko anbulategian, otorrinoarekin. Pare bat minutu lehenago iritsi naiz eta, nire harridurarako, dozenatik gora lagun zegoen zain. Halako batean atea ireki da, barruan zegoena irten da, eta -inork ezer esan gabe- zain zeudenetako bat sartu da. Handik apur batera, beste horrenbeste. Inork ez zuen kontrolatzen izenik, beraz, bi ziren aukerak: edo ez zuten hitzordurik, eta iritsi ahala sartzen ziren, hitzordua geneukanon kaltetan; edo denek zuten hitzordua, eta kontsultak zeraman metatua ordu bete luzeko atzerapena. Edozein zela ere kasua, katxondeo galanta iruditu zait, eta nire kexa azaltzera jaitsi naiz harrerara. Baina, han ere, ilada luzeak zeuden txanda argibideak emateko edo txanda berria hartzeko. Total, alde egin dudala amorratuta.

Ezin dut asko esan, nire zorionerako apenas joaten bainaiz osasun zerbitzuetara. Baina gaur ikusi ditut Osakidetzan antzinako INSSaren prepotentzia eta errespetu falta. Benetan, uste nuen ohitura horiek utziak genituela atzean. Zer dela eta, hitzordua edukita, itxoin behar da ordu bete medikuak har gaitzan?

Kategoriak Sailkatugabeak | Etiketak | 5 iruzkin

Plurala edota librea

Data: 2005(e)ko maiatzaren 21a Egilea: piperrautsa

Mezulariako tertulian ari ginen Jasone Aretxabaleta, Ander Iturriotz eta hirurok. Gaia zen Legebiltzarreko buruaren hautaketa eta, ñabardurak gora-behera, hirurak bat gentozen arazoaren kulpa handiena EAJri egozterakoan. Une horretan, entzule bat sartu zen zuzenean datu bat emateko, eta amaieran esan zuen: “Harrituta nauka Euskadi Irratiaren pluraltasunak. Seguru Espainiako irrati publikoan ez dutela PSOE horrela egurtzen”.

Pluraltasuna baino askatasuna adierazten zuen kasu zehatz honek. Askotariko iritzirik ez zegoen, baizik bakarra; baina hori zen salatzeko juxtu irratia kontrolatzen duen alderdiaren jokaera bat.

Aipatu izan da Euskadi Irratian tertuliakideak direla abertzaleak, ia beti. Esango nuke hau zor zaiola gehiago, filtro politikoei baino, errealitate bati: euskaradunen artean gehiengoa sar daiteke abertzaleen multzoan.

Hortik aurrera, bai esan dezaket tertulietan daramadan denboran, lau bat urte, ez dudala inongo zentsura, gomendio edo antzekorik jaso. Pedolibrean aritzen naiz, hemen ere.

Kategoriak Sailkatugabeak | Etiketak | Utzi iruzkina

Fellini eta blogariak

Data: 2005(e)ko maiatzaren 19a Egilea: piperrautsa

Nire bizitza markatu duten filmen artean Felliniren Amarcord izango da nabarmenena. Pasarte gogoangarri asko ditu, eta gaur bat aipatu nahi dut. Herriko mutiko koadrilak badu, beste batzuren artean, onanismoan elkarrekin aritzeko ohitura. Eta bainuetxe atzekaldean jartzen dira guztiak ilaran, bakoitza bere kanpaia joaz, eta txandaka oihukatuz musa ezberdinen izenak: La Gradisca! (herriko emakumerik deigarriena) edota La stancaia! (tabako saltzaile bular erraldoiduna).

Zergatik ote da, Sigmund maitea, irudi hau lotzen dudala blogarion jardunarekin?

Kategoriak Sailkatugabeak | Etiketak | 2 iruzkin

Atutxa, bai ala bye?

Data: 2005(e)ko maiatzaren 17a Egilea: piperrautsa

Ez da ondo hasi hauteskunde ondoko aro berria. Gehiago du oraindik zaharretik, behintzat Eusko Legebiltzarrari dagokionean. EAJk Juan Mari Atutxa jarri nahi du buru, zalantza guztien gainetik, ahaztuta orain arte egin zezakeen hainbat gauza egingaitz izango zaiola hemendik aurrera. Ez diote erraz onartuko Atutxa, tirabira gehiegi izan ditu gehiegitan, arerio gehiegirekin. Eta EBB tematzeak ez du arazoa konponduko.

Gaur entzun da agian Atutxak atzera egingo duela lehiatik, ez eramatearren auzia muturreraino, legebiltzarra bera kaltetuz. Keinu ona litzateke. Aukera berriak irekiko lizkioke bere alderdiari, baita egoera politikoari ere. Ez da ahaztu behar mahaiak bost aulki dituela eta zazpi ipurdi daudela zain. Ona litzateke lehen zailtasuna txukun samar gainditzea, animatu egingo luke giroa erronka handiagotarako.

Kategoriak Sailkatugabeak | Etiketak | Utzi iruzkina

Bost ardo eta bost plater

Data: 2005(e)ko maiatzaren 16a Egilea: piperrautsa

Ardoa boladan dago, eta bere alderik sofistikatuena hedatzen ari da ohiko eliteetatik kanpo. Adibide bat: izan berri naiz afaltzen Donostiako Maria Cristina hoteleko Easo jatetxean, afari berezian. Enate upeldegiak jarri zituen bost ardo, eta jatetxeak, haiei egokitutako bost plater. Opari bi

Sarri antolatzen dira horrelakoak, han-hemenka. Aukera ona izaten da ardo berriak ezagutzeko, eta jatetxeak ere ahalegin berezia egiten dute horrelakoetan. Gainera, ohi baino merkeago ateratzen da, ardoa ia opari izaten delako, zabalkundearen mesedetan. Oraingoan, Aragoiko upeldegiak beste opari bat ere egin zigun, berba argiko enologo gaztea, eta honek oso modu atseginean azaldu zizkigun ardo bakoitzaren ezaugarriak. Ehun lagun bueltan izan arren, arin eta ondo zerbitzatu zuten afaria.

Ardo zuria, urtekoa, gradu altukoa (13º) eta sikua. Atsegina. Hau ezkondu zuten langostinoen carpaccio batekin, alegia, mariskoaren okela gordina, marinatuta. Oso ederra zegoen, eta ondo egokitzen zitzaion ardoari. Hasiera bikaina.

  1. ardoa: Chardonnay 234 2004

    Ardo gorria, kolore bizikoa. Enologoak asko ponderatu zuen, baina ez genion punturik harrapatu. Berez, ardo gorriak dira ‘tintus interruptus’, hau da, beltzak izateko bidean etendako ardoak, eta honi sumatzen zitzaion –penaz- zertara iritsiko zen, utzi izan baliote. Jatekoa, zainzuri berdeak erreta, laranja zukutan, eta parmesano lainoaz. Txarra ez, baina hau izan zen afariko unerik ahulena.

  2. ardoa: Rosado

    Ardo beltza, mahats mota ezberdinen ‘coupage’a, sudurrean eta ahoan asko esaten duena, gogoangarria. Enologoaren hitzetan, ardo femeninoa omen, hain konplexua izanda. Honekin batera, barazki gisatuen gainean txipiroi xigortua, beronen tintaren ozpin-oliotan. Bikainak biak, edana eta jana. Gaueko gailurra.

  3. ardoa: Varietales 2001

    Ardo beltza, barietate bakarrekoa, ahoan indartsua eta sinplea; aurrekoaren ondoan zuzena, lineala. Enologoak honi esaten zion ardo arra (je!). Laguntzeko, atera ziguten pulardaren ‘noisette’a, ezti eta erromero zukutan, rukula basatiaren entsaladarekin, hau ere oso ederra. Dena den, puntu honetara iritsita, zelanbait geneukan dastatzeko gailua.

  4. ardoa: Merlot Merlot 2002

    Ardo zuria, usainez oso gozoa eta ahoan sikua. Harrigarria mahats aleman honen emaitza. Sudurrean oso hurbil mistela eta moskateletatik, aldiz ahoan da ardo zuria. Enologoak arriskua hartu zuen postrerako aukeratuta. Azken platera izan zen baso fruituen infusioa, Idiazabal gaztaren izozkiarekin. Emaitza ez zen izan biribila, baina bai interesgarria.

  5. ardoa: “Gewürtztraminer 2004”:http://www.enate.es/enaesp/vinos/gewurztraminer.htm

    Bapo edan eta bapo jan ondoren, kafetxoa hartu eta kalera. Gorputza arintze aldera, Kontxan paseatu genuen, haize freskoa hartuz burua argitzeko. Eta bueltako bidaian, cd-an Bregovic, eta buruan jiraka ideia bat: ‘Zatia hobeto, zerua lurrean’.

Pozarren

Kategoriak Sailkatugabeak | Etiketak | Utzi iruzkina