Zerotik

Data: 2005(e)ko uztailaren 1a Egilea: piperrautsa

Behin Ibarretxek legebiltzarreko koska gaindituta, eta Gernikan zin egin ondoren, hurrengo tramitea zen ezagutzea sailburuen izenak. Aurrez ez zen espero nobedade handirik, nik uste denok hartzen dugula jaurlaritza berria jardunekotzat, eta susmoak diosku kontu garrantzitsuak beste nonbait jorratuko direla.

Hala ere, joan den astean jakin genuen EAk aldatu egingo zituela bi sailburu, Iztueta eta Intxaurraga. Fakturaren bat zuten ordaintzeko, nonbait, eta ez diete barkatu. Hauen ordezkoen artean, bat da arrasatearra, Esther Larrañaga. Bide luzea darama administrazioan, eta trebatuta iritsi da kargura. Badaezpada, zorterik onena opa diot, ingurumen arloan gauzak ondo egitea denon mesederako izango da-eta.

EAkoena

Mezularian ari ginen honetaz, tertulian, ea beste aldaketarik espero ote zitekeen. Eta nik bota nuen nola gobernu akordioan jasotzen omen den -Ezker Batuaren arabera- AHTren aldaketa, eta nola EAJk hori ezeztatu zuen. Horrela, nioen Amann sailburuari erreparatuko niola bereziki, alegia, hura aldatu ezkero posible izan zitekeela beste aldaketa ere.

Alvarorena

Eta hara non, aldatu egin duten Alvaro, nire pozerako. Orain has gaitezke pentsatzen zertarako behar dugun trena eta, horren ondorioz, nolako trena behar dugun. Eta ez alderantziz, orain arte bezala. Has gaitezen trenaz pentsatzen, aurreiritzi eta morrontza barik. Zerotik.

Zerotik

Kategoriak Sailkatugabeak | Etiketak | Utzi iruzkina

Mahastia ekainean

Data: 2005(e)ko ekainaren 27a Egilea: piperrautsa

Maiatzekoak kalbario ukitua hartu bazuen, ekainekoari eztanda esan behar zaio. Derrepente, kimuak hasten dira hazten, egunean hamar bat zentimetro, eta ez dago modurik haien erritmoari eusteko. Oraintxe apenas daukadan gobernatuta mahastiaren erdia. Naturak irabazten du beti ekaineko etapa. Eta ez esprintean preziso. Loretik frutara

Maiatzean lore betean utzi genuen mahastia. Gogoratu, luku txikitxoen modukoak, berdeak. Ekainean gertatzen da eraldatze delikatua, loreak galtzen du garau forma, eta gelditzen zaio bakarrik tutua, haritxo larua. Sorta osoa ikusita, ematen du galdu egin dela, gelditzen da luku helduari garauak kenduta bezala. Lehen alditan, susto galanta hartzen du mahastizain hasi berriak. Dena izorratu zaidak!

Baina ez, okerrik ezean, tutuak hasten dira gizentzen, eta bilakatzen dira garautan, oraingoan behin betirako, fruta heldutan bihurtu arte. Une larria da, ze giro hotzak eten egin lezake bilakaera, eta orduan ez da frutarik sortzen, edo mamitzen dira luku akastunak, garau batzuk normalak eta besteak nanoak, haziko ez direnak. Mamitze esaten zaio prozesu honi, ondo egoki, nire ustez.

Tutua gizendu

Fruta mamitzen ari den bitartean, eta mahastizaina hura zaintzen, kimuek ekiten diote etengabe luzatzeari, baso amazonakoan baleude. Eta luzatzen dira norabide guztietan, egun batetik bestera. Gaur utzi duzu kimu bat alanbreari atxiki gabe, motzegia zelako. Bada, etzi egon daiteke kimu hori pasillo erdiraino irekita edo, besterik ezean, lurreko belarrei lotuta, bere kabuz. Eta alanbrean gora jarri dituzunak, txukun, lau egunetan irten daitezke goiko alanbretik gora bi metro eta etzaten hasi, alanbrea bera behera eramanez.

Kimuen desmadrea

Neguan izaten du mahatsondoak inauste nagusia, fruta bildu eta kimuak ihartu ondoren. Baina udako eztandari eusteko, egiten zaio inauste berdea. Setoak nola, halaxe ebaki behar dira adarrak, aldamen eta goi. Gurean lan hau eskuz egiten dugu, Fatimak eta biok, bakoitza ilararen alde batean. Badira makinak, noski, eta Mendrakakoek oraintxe erosi dute bat, aldamen bat eta goia batera egiten dituena. Badira sofistikatuagoak ere, hiru aldeak pasada batean egiteko, eta ikusi izan dut Dordoinan horietako bi zituen traktorea, joanaldi bakarrean bi ilara garbi-garbi uzten.

Inauste berdea

Gure mahastia txikia da, eta ilara gehienak ditu laburrak. Gainera, makina handiek mailatu egiten dute lurra, eta gero nekeza da hor ibiltzea nire makina txikiarekin. Beraz, aurten behintzat, eskuz egingo dugu inausketa berdea.

Garaua mamitu eta hazten doan honetan, hurrengo mugarria hurbiltzen da: ilar ale baten neurria hartzen duenekoa. Une horretan tokatzen da hainbat botika ematea, gorrina, botritis eta beste zenbait gaitzen kontrakoa. Gogorarazten dit ume koskorrei ematen zaien -zitzaien?- txerto trivalente izenekoa. Gure mahats garau koskorrek ere zaintza zorrotza behar dute, lanbro txar batek ez ditzan erasan.

Ilar neurria

Larritasunak gora behera, orain artekoak ondo joan dira, mahatsa bikain dator, uzta ona izan daiteke aurtengoa. Hurrengo atala, uztaila amaieran.

Kategoriak Sailkatugabeak | Etiketak | Iruzkin 1

Urtzen

Data: 2005(e)ko ekainaren 24a Egilea: piperrautsa

Metafora ezagunen artean dago azukre koskorrarena, nola urtzen den koskorra uretan hala desegiten ari da… nahi dena. Beno, ba niri metafora hau etorri zait gogora, Espainiako auzitegi nazionalak eman berri duen epaiarekin.

Ez naiz legelari, ez dut azterketa teknikorik egingo. Baina ez dago legelari izan beharrik harrapatzeko epai honek hankaz gora jartzen duela Garzonen dotrina ETAri buruz, desegiten hasi dela haren eraikin juridikoa, azukre koskorra uretan nola.

Garzonek oso zimendu ahulean altxa zuen eraikina: ETAren ingurukoak ETA dira, beraz, terrorista. Eta zigor berdina merezi dute ekintza armatuak eta babesak, laguntzak edo kidetasun ideologikoak. Bide horretatik etorri dira alderdiak legez kanporatzeak, egunkari ixteak eta auzipetze erraldoiak, 18/98+… siglapean bilduak.

Dena da…

Eta hori da, hain zuzen, auzitegi espainiarrak urtze bidean jarri duena: Jarrai eta enparauak ez dira ETA, beraz, ez dira terrorista, ez dutelako armarik erabiltzen. Deliturik leporatzen bazaie, horietara mugatzen da erantzukizuna. Horren arabera, 10 urteko zigorraren tokian, 4 urtez azpikoak etorri dira, dagoeneko bete duten kartzela aldia baino txikiagoak.

Dena ez da…

Demasa hori itzuliko ote zaien ez dakit, seguruenik ez. Eta, hala ere, poztu egin nau epaiak, Garzonen etxea urtzen hasi delako, azukre koskorra uretan nola.

Kategoriak Sailkatugabeak | Etiketak | Utzi iruzkina

¡Viva Erzaña!

Data: 2005(e)ko ekainaren 21a Egilea: piperrautsa

Presaka samar nentorren, egun luzea amaitu guran. Donostiako saihesbidera irten nuen, Amaratik, gaueko bederatziak aldera. Asko pentsatu barik, autoa jarri nuen autobideko abiaduran. Eta azken tunelean, zapla!, argazkiaren flasha. Auto asko zihoan tunelean eta une batez pentsatu nuen beste norbaitentzat izan zitekeela. Baina, ez, Arritzetako igoeran gerarazi ninduen aurrerago zihoan ertzain autoak.

  • ¡Buenas tardes!, agurtu ninduen ertzainak.
  • Arratsaldeon!, nire erantzuna.
  • Ha infringido el precepto…

Ni, haserre, muturtuta, isilik. Egina zegoen bekatua, alferrik ezer esatea. Isun papera bete eta ekarri zidanean, ordea, nahi izan nuen nire ondoeza nolabait azaldu. Eta esan zidanean:

  • Puede continuar su viaje.

Bota nion:

  • Hurrengoan euskaraz, mesedez.

Eta berak, txulo demonio:

  • Pues, por mi no.

Hau da, hurrengorako ez dut ikasiko, ez dut ikasi nahi.

Oso triste iritsi nintzen etxera.

Kategoriak Sailkatugabeak | Etiketak | 3 iruzkin

Galiza urrunago

Data: 2005(e)ko ekainaren 20a Egilea: piperrautsa

Agian, astebete barru, “Touriño”:http://www.vieiros.com/g2005/evolucion.php izango da Xuntako presidente, eta Quintana presidente orde. Agian lortuko dute, azkenean, erretira dadila Fraga zaharra. Hori bai, izatekotan izango da polo pelo dun carneiro. Baina, edozein kasutan, BNGren emaitzak urrundu egin du Galiza, kide nahi zituen Katalunia eta Euskaditik.

Bi hauetan, esan daiteke independentziarako joerak sendotuz doazela. Katalunian, ERC independentista da eta CiU, oposizioan dagoenetik, beti bat gehiago. Euskal Herrian, EAJ ez beste alderdi abertzaleek gero eta garbiago aldarrikatzen dute independentzia azken helburu gisa, eta EAJk gutxienez urtean behin ere bai.

Galizan, ordea, BNG da alderdi bakarra bi estatalisten artean, eta galera nabarmena izan du atzo. Duela lau urte bigarren indarra izan zen, sozialisten aurretik, biek hamazazpina eserleku. Eta atzo sozialistek ia bikoiztu egin dute BNGren emaitza, (25-13). Hargatik ikusten dut gaur Galiza urrunago, espainolago.

Kategoriak Sailkatugabeak | Etiketak | Utzi iruzkina

Udaldia

Data: 2005(e)ko ekainaren 17a Egilea: piperrautsa

Batzuentzat eguraldiak markatzen du udaldiaren hasiera, besteentzat paga-dobleak, edo oporrak lotuta izateak. Niretzat, Elorrion bizi den debagoiendar honentzat, uda hasten da MUSIKAIRE abiatzen denean, hau da, gaur bertan. Sei asteburuz luzatuko da kulturaren mazedonia, mota askotako musika, dantza eta antzerkiz atondua. Aire librean eta debalde. Debagoienetik joateko anima zaitezten, kopiatuko dut hemen aurtengo programaren atarikoa:

‘Gero San Joan izango zen jaia, ezarri zuen kristautasunak udako solstizioaren gainean, hau estaliz. Urteko egunik luzeenak dira sasoi honetan eta, eguzkiaren argia izanik biziaren iturri, gure arbasoek jai handia ospatzen zuten solstizioan. Eguzki sartze orduan, su handiak pizten zituzten eta haien inguruan aritzen ziren dantzan eta kantuan.

Soka beretik, MUSIKAIRE ere ospakizuna da, uda giroa gozatzeko aukera, kalean, aire librean, Elorrion. Eta honek esan nahi du: paraje eder, txoko ezkutu, baseliza, jauregi…

Aurtengo edizioan, dantzak izango du parte handia programan. Lau egunez jarraian, emango dira, plaza ondoko oholtza handian, lau dantza ikuskizun, elkarren artean oso ezberdinak, osagarriak. Hortik aurrera, ohi bezala osatu dugu mazedoniaren atal berria, askotariko musikarekin, eta kale antzerkiarekin.

Zatoz zu ere festara. Aurkituko duzu gozatzekorik. Eta dena doan da.’

Kategoriak Sailkatugabeak | Etiketak | Utzi iruzkina

Nire bostak

Data: 2005(e)ko ekainaren 13a Egilea: piperrautsa

Superdiseinatzaileak sartu zidan porrua eta ezinezkoa zait, maite ditudan kantuen artean, bost maiteenak aukeratzea. Gutxienez 50 dira, eta bat ere ez daukat sobran. Orduan, hartu dut beste irizpide bat: aukeratu ditut nire bizitzan eragingarrien izan diren bostak. Eta hauek irten dira, hurrenkera kronologikoan:

A WITHER SHADE OF PALE. Procol Harum.

Hamalau urteko nerabe erromantikoa urtu egiten zen teklatuen sarrera entzute hutsarekin.

SPACE ODDITY. David Bowie.

Hamasei urteko gizontxoak entzun zuen ahots distortsionatua esanaz: ‘Ground control to Major Tom…’ eta susmatu zituen bestelako munduak, guretik kanpo.

ATHARRATZEKO JAUREGIKO KANTUA. Benito Lertxundi.

Hemezortzi urteko euskal militanteak deskubritu zuen Zuberoa doinu honekin, eta euskal kanta ezberdinak, sonoritate aberatsekoak, auto-estimu musikala igotzeko modukoak.

SPERED HOLLVEDEL. Alan Stivell.

Hogei urteen bueltan, beste teklatu zirraragarri bat, hau bretoia, eta gazte berrizaleak inbidia hartu zuen, Stivellena iruditzen baizitzaion askozaz modernoagoa, etxekoena baino.

ALHAGI. Abdel Gadir Salim.

Berrogeita zortzi urteko gizon heldua, musikaz asea, Egunkariak argitaratutako bilduma baten aurkitu nuen kantu hau eta berriro lilura. Bartzelonan ikusi nuenetik duela 3 urte, zinez maite dut agure sudandar martxosoa.

Orain porrua doakie ondokoei:

Jon

“Iñigo”:http://www.sweetcreeps.com/euskaraz/index.php

Patxi

Leire

Pitilinario

Kategoriak Sailkatugabeak | Etiketak | 6 iruzkin

Airean

Data: 2005(e)ko ekainaren 10a Egilea: piperrautsa

Bale, Gasteizko legebiltzarrak gainditu du bigarren tapoia. Zelanbait. EA bereizi da EAJtik eta izango du bere talde parlamentarioa. Onartu diotelako. Gero EAk ez dio onartu EBri berea izatea, araudia dela-eta. Ja!

Bigarrenez, penagarria izan da ikuskizuna. Atutxarena ikasgai ona izan zuten, baina ez dute ikasi. Oraindik inork ez du erakutsi, Ibarretxeren taldean, egoeraz jabetu denik. Eta honela iristen badira lehendakari hautaketara 22an, hau da, 2 aste barru, dena dute airean. Edo okerrago.

Ibarretxe eta Lopez aurkeztuko dira. Patxik, ezer egin gabe, seguruak ditu 33 boto, 18 bereak eta 15 PPrenak. Ze, ziur nago, popularrek oparitu egingo dizkiote boto guztiak Patxiri ezer eskatu gabe, Ibarretxe kentze aldera.

Patxiren kontuak

Ibarretxek, aldiz, seguruak ditu bakarrik 22 boto, EAJrenak. EArekin negoziatzen ari dira. Ondo bidean, 29 boto. EBrekin gero negoziatuko omen dute, orduan 32 boto. Eta azkenik, Aralar konbentzitzen badute, 33 boto. Kasurik onenean, Patxik adina.

Ibarretxeren kontuak

Hortik aurrera, etorriko da EHAKri presioa egitea, ez dezan onar abertzale ez den lehendakaririk, eta bla, bla, bla….

Baina, adi! Airean daukate gobernua, eta pitokeriatan ari dira, lasai-lasai. Ibarretxeren lidergoa sendotu beharrean, txikira jokatzen dihardute, batuketak egin ere egin gabe. Eta, bitartean, lehendakaritza airean daukan honetan, non da Ibarretxe?

Ganora gutxi

Kategoriak Sailkatugabeak | Etiketak | 2 iruzkin

Kako biak etxera begira

Data: 2005(e)ko ekainaren 8a Egilea: piperrautsa

Onintza Lasa izan dugu gaur Mezularian, EAko komunikazio arduraduna. Azaldu digu zergatik lortu duten talde parlamentarioa, eta zergatik ukatu dioten EBri beste horrenbeste. Beraiek koalizioan aurkeztu ziren EAJrekin, baina bi koalizio ezberdin egin zituzten, Gipuzkoan berezi bat prestatu zuten. Horri esker, orain eskubidea omen dute, osoa eta ukaezina, bi talde parlamentariotan banatzeko. Aldiz, EBk ezin du osatu talde parlamentariorik hiru kide bakarrik dituelako, eta araudiak ukatzen dio, erabat eta zalantzarik gabe, taldea egitea. Onintzarentzat bai bata eta bai bestea dira egia absolutuak, eta beraiek ez dute besterik egin hori onartzea baino.

Nire eztarria hestua izan, ordea, eta ezin ba irentsi horrelakorik! Bai lehenengo auzia eta bai bigarrena, bozkatu egin dira legebiltzarreko mahaian, beraz zalantzazkoak ziren. Eta bietan egon dira aldekoak eta aurkakoak. Beraz,interpretagarriak ziren, ez zuten absolututik ezer.

EAk jaso du batzuren eskuzabaltasuna, eta onartu egin diote bere taldea osatzea. Gero berak ez du eskuzabal jokatu eta ukatu egin dio EBri bere taldea. Nire amak horrela deskribatzen du egoista: kako biak etxera begira dituena.

Kategoriak Sailkatugabeak | Etiketak | 6 iruzkin

Ate zanbatua

Data: 2005(e)ko ekainaren 5a Egilea: piperrautsa

Lagun bat datorkizu bisitan eta zure etxe aurrean aparkatu du bere autoa. Halako batean, pentsatzen duzue norabaitera joatea eta zure autoan sartzen zarete biak. Abiatzeko betiko maniobra egiten duzu, ohartu gabe lagunaren autoa daukazula ibilbidean, eta akordatu orduko atea zanbatu diozu. Adios!

Beno, badirudi erraz samar konpon daitekeela, baina lagunari esaten diozu zuk ordainduko duzula gastua, zu zarelako erruduna. Berak ezetz, merke izango dela konponketa, lasai egoteko.

Handik bi egunera lagunak idazten dizu e-mail larri bat, lotsak jota, esanaz atea osorik aldatu behar dela eta berak uste zuenaren doblea kostatuko dela.

Zein litzateke zure erantzuna?

Kategoriak Sailkatugabeak | Etiketak | 2 iruzkin