Aurtengoa berezia izan dugu Bailarako Dantzari Eguna, 25 urte baitira lehen aldiz Debagoieneko dantzariak Arrasaten dantza emanaldi bat emateko elkartu ziren egunetik. 

Hainbat bilera egin ostean, aurtengoa desberdina izatea adostu genuen; horretarako 25 urte hauetan zehar parte hartutako dantzari eta dantza talde guztiei gonbidapena luzatzea erabaki zen. Gaur egun aktiboan dauden 5 taldeez gain (Antzuolako Oinarin, Oñatiko Oñatz, Aretxabaletako Leizarra eta Arrasateko Lore Gazteak eta Arrostaitz), beste bi talde ere izan genituen gurekin plazan dantzan. Batetik Bergarako Xamatz Dantza Taldea eta bestetik, Eskoriatzako Gorosarri Dantza Taldea.

Goizean Arrasateko alde zaharrean zehar txistulariekin kalejiratxo bat egin ostean ekin genion dantza egiteari. Plaza bete dantzari izan zen uneoro, talde guztiek batera gehienak, baina herri bakoitzak bere dantza eskaintzeko aukera ere izan genuen. Izerdi batzuk bota ondoren, musikariek alaitutako poteotxo baten ondoren bazkari herrikoi bat ospatu genuen, dantzara gerturatutako 320tik gora dantzari eta musikarik.

Arratsaldean, beste lasaitasun batekin, Sei Pistols eta trabuko bat taldearekin dantzaldiaz gozatzea izan genuen. Gauera ere luzatu zitzaien batzuei eguna, baina kontu horiek Arrasaten utziko ditugu…

Goiena : Argazkiak

Goiena : Bideoa

Mondraberri +: Argazki eta Bideoak