Udako oporrak pasata, berriro ere martxan jarri gara dagoeneko. Kurtso berriari hasiera ezin hobea emateko, Oñatiko Dantzari Egunera joan gara talde polit batekin. Oñatiko haur egunean bailarako dantza taldeez gain beste hainbat herritatik ere etortzen dira, guztira 13 dantza talde elkartuz. Talde guztiak batera plazara bidea hartu dugu kalejira bat eginaz hamaiketako goxo bat jateko asmoz. Tripa ondo bete ondoren, Oñatiko kaleak alaitzeko asmoz kalejira txukun bat egin dugu. Hainbat tokitan dantza egin ostean, plazara abiatu gara, guztiak bertan elkartuta alkate txikiak ongi etorria egin digu, hitz goxo batzuk eta agur elegante bat eskainiz. Gero beste guztion txanda da, pasa den urtean ikasitakoa berriz plazaratzeko garaia iritsita, hautsa kenduz goizari amaiera ezin hobea eman diogu. Umeak etxeetara joan eta ederki asko jan ondoren, arratsaldeko saioarekin amaitu dugu eguna.