Urtero bezala, udaberriko oporrak pasa eta gero, lehen hezkuntzako seigarren mailako ikasleei Erdiguneko GazteGuneko ateak ireki dizkiegu.
Gazte hauentzat dena berria da eta oso aktibo datoz, beraz, izugarrizko asteburu polita izan dugu honi esker! Gauza mordoa egin dugu!
Gaztegunean daukagun material ia guztia erabili dugu; futbolina, pinpona, ordenagailuak, hankapaloak, djenbeak, mahai jolasak, … Saltseatzen izugarri ondo pasa dugu!
Sukaldea ere erabili genuen, eta taldetxo batek proposatuta, oso azkar egiteko txokolatezko bizkotxoa sukaldatu genuen. Sukaldari apartak ditugu, bai bizkotxo ederra!
Beste taldetxo baten nahiei erantzunda, atzeko gelan pelikula emanaldia eskeini genuen; “Oxido y hiero” izan zuten gazteek ikusgai.
Oholtzari ere eman genion erabilera. Ostiralean gazte bat kitarrarekin agertu zen gurera, eta adore eta talentuz gainezka oholtzan izugarrizko ikuskizuna eskaini zigun! Artista itzela!
Domekan berriz ere erabili genuen, beste ikuskizun bat eskeintzeko: Erdaldun Berrien Kluba! Ederto pasa genuen bakarrizketako protagonista den Irantzuren gogoetak entzuten! Izugarrizko barreak egin genituen!
Datozen asteak ere halako aktiboak eta ekintzaz beteak izango dira, beraz, animatu eta parte hartu!
