Obispo hotela. Etxebeste etxea
Gure aita zena nik hotela jarri arte ez zuen Apezpiku plaza ezagutu, 76 urterekin, ezta Panpinot kalea, Eguzki kalea... Eliza bai, funeralengatik, baina kitto.
Arrantzale jendeak ez du ezagutzen alde hau, orain gazteek bai; Alde Zaharrera etortzen dira, giro ona dagoelako. Portua eta Alde Zaharra oso diferente bizi izandu ziren. Irudi du istilu handirik ez dela izan, baina inbidia bai. Garai batean bi trainera izandu ziren herri honetan: Portukoa eta Alde Zaharrekoa. Betiro bi giro, eta Alde Zaharra bigarren mailakoa izandu da.
Udalak gauza batzuk kopondu ditu: Apezpiku plaza, Arma plaza –lehen autoak egoten ziren aparkatuak, eta txukundu ondoren asko irabazi zuen–; trafikoa zela-eta arazo handiak izaten ziren eta udalak erabaki zuen murriztea. Nire ustez, Alde Zaharrean komertzio berezia egon beharko luke. Baina udalak baimena emanez gero etxebizitzak egiteko –nahiko da 37 metro kuadro eta bi hueko kanpora–, ez dago aukerarik ezer jartzeko.
Proposatu izan balitu alokairu egokiak, bada, artisauek izango lukete irtenbideren bat. Legeak bidea ireki du etxebizitzak egiteko, hor dago errua. Udalak ez du asmatu Alde Zaharreko bizitza antolatzen.
Auzo bati, herri bati tabernek ematen diote bizia, baina ez horiek bakarrik, bizia komertzioak ere ematen dio, eta hemen 8-10 bat artisaurekin, giro polita sortuko litzateke. Nik nahiko nuke Donibane Garaziko giroa, kale guztiak dendaz beteta, arratseko 8ak arte terrazak gainezka. Pintxo gutxi aurkituko duzu hemengo tabernetan. Hemengoa, gaueko giroa da… kopak.
