Honezkero jakingo duzuenez, Euskara Jendea izeneko dokumental sorta egiten ari den taldeak hilarri interesgarria aurkitu du Parisen. Epigrafistek bazuten hilarriaren berri, baina galduta zegoen aspaldi. Informazio zabala aurki daiteke hedabideetan: ETB, Berria, Gara
Gogoeta kritikoa eta informazio interesgarria Euskararen Jatorriaren blogean.
Sustatun topatu dut epigrafearen transkripzioa eta itzulpena. Gune horretan agertzen den argazkia ere oso garbia da. Lehenagotik zeuden transkripzioekin, eta argazki honi begiratuta, ondorengoa geratu da.
C[aio]·MOCCONIO·C[ai]· F[ilio]·FAB[ia]·VERO
PRAETORI·LEGATO·PR[o]·PR[aetore]
PROVINCIAE·ACHAIAE·TR[ibuno]·PL[ebis]
Q[uaestori]·URBANO·III·VIR[o]· CAPITALI
TRIBUNO·LATICLAVIO·LEG[ionis]
VII·GEMIN[ae]·AT CENSUS·ACCIPIEN
DOS·CIVITATIUM·XXIII
VASCONUM·ET·VARDULORUM
VIXIT·ANIS·XXXVI
EX·TESTAMENTO
itzulpena (Maite Goñi, Sustatu)
Fabia leinukoa eta Caius-en semea den Caius Mocconius Verus-i
(dedikatzen zaio hilarri hau),
Achaia probintziako Pretor funtziodun pretor legatoa izandakoa
(gobernadore modukoa),
Plebeko tribunoa izandakoa (gobernu zentraleko goi mailako kargu modukoa,
garai hauetan kargua entzutetsua da baina ez botere errealduna),
hiriko questorra izandakoa (Erroma hiriko diruen arduraduna),
triumviro capital izandakoa
(gartzelen eta exekuzioen arduraduna heriotza zigorra dagoenean),
Baskoien eta Barduloen 23 hirien zentsoa egin zuen
Gemina VII.a legioko tribuno latiklaboa izan zen
(senatore mailako Legioaren 2. arduradun)
36 urte bizi izan zituen
bere testamentuan (…horrela idatzita utzi zuelako, hilarri hau jarri egin da).
Aldaketa txiki bat egin diot Maite Goñiren itzulpenari: Arkaia jartzen duen lekuan Achaia ipini dut, errata delakoan. Interneten irakurtzen dudanez, Achaia Greziako Peloponesoko eskualdea da. Beste ukitutxoren bat ere egin diot.
Mertxe Urteaga arkeologoak aurkezpenean adierazi zuen hilarrian aipatzen diren Barduliarren eta Baskoien 23 hiriak K.o. II. mendean Ptolomeo geografoak zerrendatzen dituenak izan daitezkeela.